នាព្រឹកថ្ងៃអង្គា១៤រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី៧ ខែឧសភា ឆ្នាំ២០២៤ នេះ ឯកឧត្ដមបណ្ឌិត នុត សម្បត្តិ ប្រធានវិទ្យាស្ថានជីវសាស្រ្តវេជ្ជសាស្រ្តនិងកសិកម្ម បានដឹកនាំថ្នាក់ដឹកនាំនៃនាយកដ្ឋានវិទ្យាសាស្រ្តសុខាភិបាលជួបប្រជុំជាមួយនឹងក្រុមគ្រូពេទ្យវេជ្ជសាស្រ្តបុរាណចិនប្រចាំនៅមន្ទីពេទ្យព្រះកុសុមៈ។ ជំនួបពិភាក្សានាឱកាសនេះ ត្រូវបានរៀបចំឡើងក្នុងគោលបំណងពិភាក្សាការងារ និងពិនិត្យមើលលទ្ធភាពដែលអាចឈានទៅរកការធ្វើកិច្ចសហប្រតិបត្តិការស្រាវជ្រាវរួមគ្នា ស្តីពី «ការប្រើប្រាស់ឱសថបុរាណចិននៅកម្ពុជា»។ ដោយមើលឃើញបញ្ហាប្រឈមជាច្រើននៃភាពមិនច្បាស់លាស់ក្នុងការប្រើប្រាស់ឱសថបុរាណចិននៅកម្ពុជា ជាពិសេស គុណភាព ប្រភព និងកម្រិតសមត្ថភាពរបស់អ្នកចែកចាយឱសថបុរាណចិន ដែលកំពុងចរាចរនៅលើទីផ្សារនៅកម្ពុជា ឯកឧត្តមបណ្ឌិត បានស្នើសុំដល់ក្រុមគ្រូពេទ្យវេជ្ជសាស្រ្តបុរាណចិនសហការក្នុងការសិក្សាស្រាវជ្រាវឱ្យបានច្បាស់លាស់ ដើម្បីជាប្រយោជន៍ដល់សុខភាពប្រជាជនកម្ពុជា ព្រមទាំងលើកកម្ពស់កិត្យានុភាពនៃឱសថបុរាណចិននៅកម្ពុជាផងដែរ។